சுன்னத் தொழுகைகள்

தொழுகை என்பது இஸ்லாத்தின் ஐம்பெருங் கடமைகளில் ஏகத்துவக் கலிமாவிற்கு அடுத்தபடியாக தலையாய கடமையாக இருக்கிறது. தொழுகையின் முக்கியத்துவம் எத்தகையதெனில், “ஒரு முஸ்லிமுக்கும் இறை நிராகரிப்பாளக்கும் (காஃபிர்) இடையிலுள்ள வித்தியாசமே தொழுகை தான்” என நபி (ஸல்) அவர்கள் கூறியுள்ளார்கள். இந்த சிறிய தொகுப்பில் பர்லு, நபில் மற்றும் சுன்னத் தொழுகை பற்றிய சிறு குறிப்புகளைப் பார்ப்போம்.

  நபில் தொழுகை: -

இவைகள் அதிகப்படியான (உபரியான) தொழுகை. ஒருவர் இவற்றை தொழுதால் அல்லாஹ்விடத்தில் மிகப் பெரும் நற்கூலி கிடைக்கும். ஒருவர் இந்த தொழுகைகளைத் தொழவில்லை எனில் அவர் மீது பாவமில்லை.

சுன்னத் தொழுகை: -

தானாக மனமுவந்து தொழக் கூடிய தொழுகை. நபி (ஸல்) அவர்கள் இந்தத் தொழுகையைத் தொழுது வந்ததால் அவர்களைப் பின்பற்றி நாமும் தொழுது வருவது சிறந்ததாக இருக்கும். ஒருவர் இந்தத் தொழுகைகளை தொழுது வந்தால் அல்லாஹ்விடத்தில் மிகப்பெரும் நற்கூலி கிடைக்கும். ஒருவர் தொழவில்லை எனில் அவர் மீது குற்றமில்லை. ஆனால் நபி (ஸல்) அவர்கள் தொழுது வந்த இந்த சுன்னத் தொழுகைகளை தொழாதவர் அல்லாஹ்விடத்தில் மிகப்பெரும் நற்கூலியை அடையக் கூடிய பாக்கியத்தை இழந்தவராவார்.

மறுமையில் முதல் விசாரனை தொழுகையைப் பற்றியதாகும்!

நபி (ஸல்) அவர்கள் கூறினார்கள்: -

மறுமையில் ஒரு மனிதனின் அமல்களைப் பற்றி விசாரிக்கப்படும் போது தொழுகையைப் பற்றியே முதன் முதலாக விசாரிக்கப்படும். அது சீராக அமைந்து விடுமேயானால் ஏனைய அனைத்து வணக்க வழிபாடுகளும் சீராகவே அமையும். அது சீராகவில்லையென்றால் ஏனைய அனைத்தும் சீரற்றதாகவே இருக்கும். அறிவிப்பவர்: அபூஹுரைரா (ரலி), ஆதாரம் : அபூதாவுத்.

சுன்னத் மற்றும் நபில் தொழுகையின் முக்கியத்துவம்:-

நபி (ஸல்) அவர்கள் கூறினார்கள்: -

மறுமை நாளில் தொழுகையைப் பற்றித்தான் மக்கள் முதன்முதலாக விசாரிக்கப்படுவார்கள். மலக்குகளிடத்தில் நம்முடைய இறைவன், தான் நன்றாக அறிந்திருந்த போதிலும், சொல்லுவான், “என்னுடைய இந்த அடியானின் தொழுகையை (பர்லு), அவன் அதை சரியாக நிறைவேற்றி உள்ளானா அல்லது அதைவிட்டும் பாராமுகமாகி இருந்திருக்கிறானா என்று பாருங்கள். அவன் அதை சரியாக செய்திருந்தால் அதற்குரிய வரவு எழுதப்பட்டுவிடும். அதை விட்டும் அவன் தவிர்ந்திருந்தால் ஏதாவது அதிகப்படியான (நபில், சுன்னத்) தொழுகைகளை தொழுதிருக்கிறாரா என்று பார்க்கும்படி அல்லாஹ் கூறுவான். “அவர் அதிகப்படியான தொழுகையை தொழுதிருந்தால் அவர் விட்டு விட்ட கட்டாய தொழுகையை அவரின் அதிகப்படியான தொழுகையைக் கொண்டு ஈடுசெய்யுங்கள்” என்று அல்லாஹ் கூறுவான். அதற்குப் பிறகு அவருடைய அனைத்து செயல்களும் இவ்வாறே முடிவு செய்யப்படும். அறிவிப்பவர் : அபூஹுரைரா (ரலி), ஆதாரம்: அபூதாவுத்.

எனவே சகோதர சகோதரிகளே!  இத்தகைய முக்கியத்துவம் வாய்ந்த நபி (ஸல்) அவர்களின் சுன்னத்தான தொழுகைகளையும் உபரியான நபில் தொழுகைகளையும் முறைப்படி பேணி தொழுது வருவோமாக. அல்லாஹ் நமக்கு அதற்கு அருள் புரிவானாகவும்.

தானாக மனமுவந்து தொழக் கூடிய தொழுகை. நபி (ஸல்) அவர்கள் இந்தத் தொழுகையைத் தொழுது வந்ததால் அவர்களைப் பின்பற்றி நாமும் தொழுது வருவது சிறந்ததாக இருக்கும். ஒருவர் இந்தத் தொழுகைகளை தொழுது வந்தால் அல்லாஹ்விடத்தில் மிகப்பெரும் நற்கூலி கிடைக்கும். ஒருவர் தொழவில்லை எனில் அவர் மீது குற்றமில்லை. ஆனால் நபி (ஸல்) அவர்கள் தொழுது வந்த இந்த சுன்னத் தொழுகைகளை தொழாதவர் அல்லாஹ்விடத்தில் மிகப்பெரும் நற்கூலியை அடையக் கூடிய பாக்கியத்தை இழந்தவராவார்.

நபி (ஸல்) அவர்கள் தொழுகையின் முன் பின் சுன்னத்துக்களாக 12 ரக்அத்துகளைத் தொழுது வந்திருக்கிறார்கள். ஒருவர் பிரயாணத்தில் இல்லாமல் ஊரில் இருந்தால் இந்த 12 ரக்அத்துக்களையும் முறைப்படி பேணி தொழுது வருவது ஒவ்வொரு முஸ்லிமுக்கும் விரும்பத்தக்கதாகும்.

தொழுகையின் முன் பின் சுன்னத்துகள்: -

ஃபஜ்ர் முன் சுன்னத்து – 2 ரக்அத்துகள்

லுஹர் முன் சுன்னத்து – 4 ரக்அத்துகள் (2+2)

லுஹர் பின் சுன்னத்து – 2 ரக்அத்துகள்

மஃரிப் பின் சுன்னத்து – 2 ரக்அத்துகள்

இஷா பின் சுன்னத்து – 2 ரக்அத்துகள்

லுஹருடைய முன் சுன்னத்து நான்கு ரக்அத்துகளை இரண்டிரண்டு ரக்அத்துகளாக தொழ வேண்டும்.

நபி (ஸல்) அவர்கள் கூறினார்கள்: -

“ஒரு நாளைக்கு 12 ரக்அத்துகள் நஃபிலாக (உபரியாக) யார் தொழுது வருகிறாரோ அவருக்கு சுவனத்தில் ஒரு மாளிகை எழுப்பப்படும்”.

வித்ரு தொழுகை:-

இஷா தொழுகைக்கு பின் வித்ரு தொழுவது ஒரு முஸ்லிமுக்கு சுன்னத்தாகும்.

நபி (ஸல்) அவர்கள் ஊரில் இருந்தாலும் சரி அல்லது பிரயாணத்தில் இருந்தாலும் சரி, வித்ருடைய தொழுகையை, பஜ்ருடைய தொழுகை – இவ்விரண்டையும் விடாமல் தொழுது வந்திருக்கிறார்கள்.

இகாமத் சொல்லப்பட்டு விட்டால்: -

பர்லு தொழுகைக்காக இகாமத் சொல்லப்பட்டுவிட்டால் சுன்னத்தான தொழுகையைத் தொழக் கூடாது. ஏனெனில் தொழுகைக்காக இகாமத் சொல்லப்பட்டால் கடமையான தொழுகையைத் தவிர வேறு தொழுகை கிடையாது என நபி (ஸல்) அவர்கள் கூறினார்கள். (ஆதாரம் : முஸ்லிம்)